ଭାରତୀୟ କ୍ରିକେଟ ଦଳର ମୁଖ୍ୟ ଚୟନକର୍ତ୍ତା ହେଲେ ଚେତନ ଶର୍ମା , ପ୍ରତିକ୍ରିୟା ପ୍ରକାଶ କଲେ ଫ୍ୟାନ୍ସ

ଶବ୍ଦ ଓଡିଶା ବ୍ୟୁରୋ: ଭାରତୀୟ ଦଳ ଶନିବାର ଶ୍ରୀଲଙ୍କା ବିପକ୍ଷରେ ତୃତୀୟ ଟି-୨୦ ଖେଳିବା ପାଇଁ ପ୍ରସ୍ତୁତ ହେଉଥିଲା. ଏହାର କିଛି ସମୟ ପୂର୍ବରୁ ବିସିସିଆଇ ଗୋଟିଏ ବଡ ନିଷ୍ପତ୍ତି ନେଇଛନ୍ତି । ବୋର୍ଡ ଦ୍ୱାରା ନୂଆ ଚୟନକର୍ତ୍ତା କମିଟିର ଘୋଷଣା କରାଯାଇଛି । ଏଥିରେ ପୁଣି ଥରେ ଚେତନ ଶର୍ମାଙ୍କୁ ଦଳର ମୁଖ୍ୟ ଚୟନକର୍ତ୍ତା ଭାବେ ନିଯୁକ୍ତି ମିଳିଛି । ଟି-୨୦ ବିଶ୍ୱକପରେ ଦଳର ବିଫଳତା ପରେ ବିସିସିଆଇ କଡା ଆଭିମୁଖ୍ୟ ଗ୍ରହଣ କରି ଚେତନ ଶର୍ମାଙ୍କୁ ପଦରୁ ହଟାଇଦେଇଥିଲେ । ପୁଣି ଥରେ ତାଙ୍କୁ ଏହି ପଦ ଦିଆଯିବାକୁ ନେଇ ଫ୍ୟାନ୍ସମାନେ ନାରାଜ ଅଛନ୍ତି । ବିସିସିଆଇ ଉପରେ ସାମାଜିକ ଗଣମାଧ୍ୟମରେ ଜୋରଦାର ବର୍ଷୁଛନ୍ତି ଫ୍ୟାନ୍ସ ।
୨୦୨୨ ଟି-୨୦ ବିଶ୍ୱକପ ସେମିଫାଇନାଲରେ ଇଂଲଣ୍ଡ ନିକଟରୁ ପରାସ୍ତ ହୋଇଥିଲା ଭାରତ । ଦଳର ପ୍ରଦର୍ଶନ ନେଇ ସେତେବେଳେ ପ୍ରଶ୍ନ ଉଠୁଥିଲା । ଏହାର କିଛି ଦିନ ମଧ୍ୟରେ ବିସିସିଆଇ ପଦକ୍ଷେପ ନେଇ ଚେତନ ଶର୍ମାଙ୍କ ନେତୃତ୍ୱଧିନ ଚୟନକର୍ତ୍ତା କମିଟିକୁ ଭଙ୍ଗ କରିଥିଲେ । ତେବେ ଏହାର କିଛି ସମୟ ପରେ ସେହି କମିଟି ହିଁ ଶ୍ରୀଲଙ୍କା ବିରୋଧରେ ଭାରତୀୟ ଦଳ ଚୟନ କରିଥିଲେ । ପୁଣି ଥରେ ଚେତନ ଶର୍ମାଙ୍କୁ ନୂଆ ମୁଖ୍ୟ ଚୟନକର୍ତ୍ତା ଭାବେ ନିଯୁକ୍ତି ମିଳିଛି । ସୋସିଆଲ ମିଡିଆରେ ବିସିସିଆଇ ବିରୋଧରେ ଜୋରଦାର ପ୍ରତିକ୍ରିୟା ପ୍ରକାଶ ପାଇଛି । ସେମାନେ ପ୍ରଶ୍ନ କରିଛନ୍ତି ଯଦି ପୁଣି ଚେତନ ଶର୍ମାଙ୍କୁ ଫେରାଇ ଆଣିବାର ଥିଲା ତେବେ ବିଶ୍ୱକପ ପରେ ତାଙ୍କୁ ବରଖାସ୍ତ କରାଯାଉଥିଲା କାହିଁକି । କିଛି ଜଣ ଏହା ମଧ୍ୟ କହିଛନ୍ତି ବିସିସିଆଇ ଦ୍ୱାରା ଏହା ସବୁଠାରୁ ଖରାପ ନିଷ୍ପତ୍ତି । ଆଉ କିଛି ଜଣ ତ କହିଛନ୍ତି ଦଳ ଆଉ ଗୋଟିଏ ବିଶ୍ୱକପ ହାରିବାକୁ ପ୍ରସ୍ତୁତ ହେଉଛି ।