ତେଜସ୍ ରେ ଉଡିଲେ ପ୍ରଧାନମନ୍ତ୍ରୀ, ଦେଖନ୍ତୁ ମୋଦିଙ୍କ ପାଇଲଟ୍ ଲୁକ

ସ୍ବଦେଶୀ ଲଢୁଆ ବିମାନ ‘ତେଜସ’ରେ ଉଡିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଟ୍ବିଟ୍‌ କରି କହିଲେ ଅନୁଭବ ଅବିଶ୍ବସନୀୟ । ବାୟୁସେନା, ଏଚଏଏଲ ଓ ଡିଆରଡିଓକୁ କଲେ ପ୍ରଶଂସା ।ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଭାରତୀୟ ବାୟୁସେନାର ସ୍ବଦେଶୀ ଲଢୁଆ ବିମାନ ‘ତେଜସ’ରେ ଉଡାଣ ଭରିଛନ୍ତି । ବେଙ୍ଗାଲୁରୁ ସ୍ଥିତ ହିନ୍ଦୁସ୍ଥାନ ଏରୋନେଟିକ୍ସ ଲିମିଟେଡ (ଏଚଏଏଲ) ପରିଦର୍ଶନ କରିବା ଅବସରରେ ସେ ସ୍ବଦେଶୀ ନିର୍ମିତ ଏହି ଅତ୍ୟାଧୁନିକ ଲଢୁଆ ବିମାନରେ ଉଡାଣ ଭରିଛନ୍ତି । ଟ୍ବିଟ୍‌ କରି ପ୍ରଧାନମନ୍ତ୍ରୀ ଅତ୍ୟନ୍ତ ଖୁସିବ୍ୟକ୍ତ କରିବା ସହ କହିଛନ୍ତି, ‘‘ତେଜସରେ ସଫଳତା ପୂର୍ବକ ଉଡାଣ ଭରିଲି । ଏହା ମତେ ମୋ ଦେଶର ସ୍ବଦେଶୀ ଜ୍ଞାନକୌଶଳ ଉପରେ ଆହୁରି ଆତ୍ମବିଶ୍ବାସ ବଢାଇବାର ଅବସର ଦେଇଛି । ତେଜସରେ ସଫଳତା ପୂର୍ବକ ଉଡାଣ ଭରିବାର ଅନୁଭବ ଅବିଶ୍ବସନୀୟ ଥିଲା । ମୁଁ ଆଜି ଅବସରରେ ଏହା ଅତି ଗର୍ବର ସହ କହିପାରେ, ଆମ ପରିଶ୍ରମ କାରଣରୁ ଆତ୍ମନିର୍ଭରତା କ୍ଷେତ୍ରରେ ଆମେ ବିଶ୍ବରେ କାହା ଠାରୁ କମ ନୁହନ୍ତି । ଭାରତୀୟ ବାୟୁସେନା, ଡିଆରଡିଓ ଓ ଏଚଏଏଲ ସମେତ ଦେଶବାସୀଙ୍କୁ ହାର୍ଦ୍ଦିକ ଶୁଭେଚ୍ଛା । ’

मैं आज तेजस में उड़ान भरते हुए अत्यंत गर्व के साथ कह सकता हूं कि हमारी मेहनत और लगन के कारण हम आत्मनिर्भरता के क्षेत्र में विश्व में किसी से कम नहीं हैं। भारतीय वायुसेना, DRDO और HAL के साथ ही समस्त भारतवासियों को हार्दिक शुभकामनाएं। pic.twitter.com/xWJc2QVlWV

— Narendra Modi (@narendramodi) November 25, 2023

ଆଜି ପୂର୍ବାହ୍ନରେ ପ୍ରଧାନମନ୍ତ୍ରୀ ବେଙ୍ଗାଲୁରୁ ସ୍ଥିତି ହିନ୍ଦୁସ୍ଥାନ ଏରୋନେଟିକ୍ସ ଲିମିଟେଡର ମୁଖ୍ୟାଳୟରେ ପହଞ୍ଚିଥିଲେ । ସେଠାରେ ଜାରି ରହିଥିବା ଲଢୁଆ ବିମାନ ନିର୍ମାଣ କାର୍ଯ୍ୟ ତଦାରଖ କରିଥିଲେ । ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଥିଲେ । ସେ ଏହି ଅବସରରେ ଭାରତରେ ପ୍ରତିରକ୍ଷା ସାମଗ୍ରୀର ନିର୍ମାଣ ଓ ଆତ୍ମନିର୍ଭର ହେବା ସହ ବିଦେଶ ରପ୍ତାନୀ ପାଇଁ ତାଙ୍କ ସରକାର କିପରି ପଦକ୍ଷେପ ଗ୍ରହଣ କରିଛି, ସେ ସମ୍ପର୍କରେ ଗୁରୁତ୍ବାରୋପ କରିଥିଲେ । ଏହା ପରେ ଏଚଏଏଲ ନିର୍ମିତ ହାଲୁକା ଲଢୁଆ ବିମାନ ତେଜସରେ ଉଡାଣ ଭରିଥିଲେ । ଏହି ଉଡାଣ ଅବସରରେ ତାଙ୍କୁ ସମ୍ପୂର୍ଣ୍ଣ ବାୟୁସେନା ପାଇଲଟଙ୍କ ପୋଷାକରେ ଦେଖିବାକୁ ମିଳିଥିଲା । ଏହା ପରେ ସେ ଏକାଧିକ ଫଟୋ ସହ ଉଡାଣ ଅନୁଭୂତି ଏକ୍ସରେ ଟ୍ବିଟ୍‌ କରି ସେୟାର ମଧ୍ୟ କରିଥିଲେ ।