ପବିତ୍ର ମହାବିଷୁବ ସଂକ୍ରାନ୍ତି, ମାଆ ଭଗବତୀଙ୍କ ଉତ୍ତରଦିଗକୁ ଯାତ୍ରା

ଶବ୍ଦ ଓଡିଶା ବ୍ୟୁରୋ: ପବିତ୍ର ମହାବିଷୁବରେ ଉତ୍ତରଦିଗକୁ ଯାତ୍ରା ଆରମ୍ଭ କଲେ ମା’ ଭଗବତୀ । ଓଡ଼ିଆ ନବବର୍ଷ ପବିତ୍ର ପଣା ସଂକ୍ରାନ୍ତିରେ ପୀଠରେ ସମସ୍ତ ନୀତିକାନ୍ତି ସାରି ଗୋଧୂଳି ଲଗ୍ନରେ ନିଶଙ୍କୁଡ଼ି ଧୂପ ପରେ ଘଣ୍ଟା ଘଣ୍ଟ କାହାଳୀ ଆଲଟଚାମର ସହିତ ଥାଟ ପଟୁଆରରେ ନିଯୋଗୀ ସେବାୟତଙ୍କ ସହ ଉତ୍ତରଦିଗକୁ ଯାତ୍ରା ଆରମ୍ଭ କଲେ ମା’ ଭଗବତୀ ।

ନୂତନ ବର୍ଷ ପ୍ରାରମ୍ଭ ଦିନରେ ସୂର୍ଯ୍ୟଦେବତାଙ୍କ ବିଷୁବ ରେଖାରେ ଅବସ୍ଥାନ ପରେ ଉତ୍ତରାୟଣ ଗତି ଆରମ୍ଭକୁ ଆଧାର କରି ମା’ଙ୍କ ଉତ୍ତରଦିଗରକ୍ଷାକାରିଣୀ, ଶୋଲରୀ ପାହାଡ଼ କୋଳରେ ପୂଜିତା ଭଉଣୀ ମା’ ସିଦ୍ଧେଶ୍ଵରୀଙ୍କ ନିକଟକୁ ଯାତ୍ରା କରିବାର ପରମ୍ପରା କେଉଁ ପ୍ରାଚୀନ କାଳରୁ ଚଳି ଆସୁଛି । ଏହି ଅନୁସାରେ ଯାତ୍ରା ପଥରେ ବଡ଼ହନ୍ତୁ ଆଡ଼ ଗ୍ରାମର ଦଣ୍ଡଠାକୁର ରାଜରାଜେଶ୍ଵରଙ୍କ ନିମନ୍ତ୍ରଣ ରକ୍ଷା କରି ଐତିହାସିକ ପଲଟଣ ପଡ଼ିଆରେ ଉଭୟ ଦେବା ଦେବୀ ବାଣରୋଷଣୀର ଶବ୍ଦ ସହିତ ଅଗଣିତ ଶ୍ରଦ୍ଧାଳୁଙ୍କ ହରିବୋଲ ହୁଳହୁଳି ଧ୍ବନୀରେ ଶ୍ରୀ ଶ୍ରୀ ଚରଣ ଚକା ଦେବଙ୍କୁ ଦର୍ଶନ କରିଫୁଲ ଚନ୍ଦନ ଗ୍ରହଣ କରିବା ପରେ ଗ୍ରାମ ପରିକ୍ରମା କରି ଟିକରାଇ ଦେବୀଙ୍କ ମନ୍ଦିର ପାର୍ଶ୍ଵ ଦେଇ ଯାତ୍ରା କରନ୍ତି।

ଘନ ଅନ୍ଧାରରେ ସେବାୟତମାନେ ଦିହୁଡ଼ି ଆଲୁଅରେ ଅଣବାଟରେ ରାମଚନ୍ଦ୍ରପୁର ଗ୍ରାମର ପାହାଡ଼ ତଳି ରାସ୍ତାରେ ଯାଇ ବାଟରେ ଡାଳ ଖାଇ ଠାକୁରାଣୀଙ୍କ ନିକଟରେ ବିଶ୍ରାମ ନିଅନ୍ତି । ଭାଟପଡ଼ାଗଡ଼ର ଦଳବେହେରାଙ୍କ ନିମନ୍ତ୍ରଣ କ୍ରମେ ଗ୍ରାମବାସୀଙ୍କ ତରଫରୁ ପୁଷ୍ପଚନ୍ଦନ ଗ୍ରହଣ କରି ପଟୁଆରରେ ଗ୍ରାମ ପରିକ୍ରମା ପରେ ଶୋଲରୀ ପାହାଡ଼ର ଖୋଲରେ ପୂଜିତା ମା’ ଶିଦ୍ଧେଶ୍ଵରୀଙ୍କ ମନ୍ଦିରକୁ ବିଜେ କରନ୍ତି।ସେଠାରେ ମନ୍ଦିରଜାନି ସେ ବାୟତଙ୍କ ଦ୍ଵାରା ଉଭୟ ଠାକୁରାଣୀଙ୍କୁ ନୈବେଦ୍ୟ ଅର୍ପଣ ପରେ ସେବାୟତମାନେ ପ୍ରସାଦ ଗ୍ରହଣ କରିବା ପରେ ଆଜ୍ଞାମାଳ ହୁଏ ।

ଆଗାମୀ ଶାରଦୀୟ ପର୍ବକୁ ଭଉଣୀ ସିଦ୍ଧେଶ୍ଵରୀଙ୍କୁ ନିମନ୍ତ୍ରଣ କରି ଆଜ୍ଞାମାଳ ଧରି ଭାଟ ପଡ଼ାଗଡ଼ଦଳ ବେହେରାଙ୍କ ଉଆସ ଆଗରେ ଦଧିବାମନ ମନ୍ଦିର ସମ୍ମୁଖରେ ପନ୍ତି ଭୋଗ ଖାଇ ପାହାନ୍ତି ପହରକୁ ମନ୍ଦିରକୁ ପ୍ରତ୍ୟାବର୍ତ୍ତନ କରିବାର ପରମ୍ପରା କାହିଁ କେଉଁ କାଳରୁ ଚଳି ଆସିଛି । ମା’ଙ୍କୁ ପଣା ସଂକ୍ରାନ୍ତି ଦିନ ଦର୍ଶନ କରିବା ପାଇଁ ଅଗଣିତ ଶ୍ରଦ୍ଧାଳୁଙ୍କ ଭିଡ଼ ସହିତ ଭାଟପଡ଼ାଗଡ଼ ଉତ୍ସବମୁଖର ହୋଇଉଠିଥିଲା। ଗ୍ରାମରେ ପାଲା ସଂକୀର୍ତ୍ତନସହିତ ପାରମ୍ପରିକ ନୃତ୍ୟସଂଗୀତ ଆସରର ଆୟୋଜନ କରାଯାଇଥିଲା। ଦଳବେହେରା ମାନବେନ୍ଦ୍ର ମହାରଥାଙ୍କ ତରଫରୁ ମା’ଙ୍କ ନୀତିକାନ୍ତି ସହିତସମସ୍ତ ପ୍ରକାର ସୁବନ୍ଦୋବସ୍ତ କରାଯାଇଥିବା କଥା ଦେବୋତ୍ତର କାର୍ଯ୍ୟାଳୟର କାର୍ଯ୍ୟନିର୍ବାହୀ ଅଧିକାରୀ ବାଳମୁକୁନ୍ଦ ଦାସସୂଚନା ଦେଇଛନ୍ତି