ଚିଲିକାରେ ଯାତ୍ରୀ ସୁରକ୍ଷା ଓ କୋଭିଡ ସଚେତନତାକୁ ନେଇ ସାଧାରଣ ସଭା

ଭାରତର ବୃହତ ଲୁଣା ହ୍ରଦ ଚିଲିକା  । ଗୋଟିଏ ପଟେ ମାଆ କାଳିଜାଇଙ୍କ ମନରୋମ ପୀଠ,ଅନ୍ୟପଟେ ଶ୍ରୀଜଗନ୍ନାଥଙ୍କ ଗୁପ୍ତଲୀଳାର କ୍ଷେତ୍ରର କାଙ୍କଣଶିଖରୀ,ବିଦେଶାଗତ ପକ୍ଷୀଙ୍କ ପ୍ରିୟ ନଳବଣ ଓ ଚଢେଇଗୁହା । ପ୍ରାକୃତିକ ଶୋଭାରେ ଟିକେ ଆନମନା ହେବାକୁ ଓ ଆଧ୍ୟାତ୍ମିକ ଭାବରେ ହଜିଯିବାକୁ ସାରା ବର୍ଷ  ଶହ ଶହ ପର୍ଯ୍ୟଟକ ,ଚିଲିକାରେ ଜଳଯାତ୍ରା କରୁଛନ୍ତି  । ସରକାରୀ ବୋଟ ସହ ଅନ୍ୟାନ୍ୟ ୩୦୦ରୁ ଅଧିକ ବେସରକାରୀ ମୋଟରବୋଟ ଯାତ୍ରୀଙ୍କୁ ଚିଲିକାରେ ବୋଟିଂ ସେବା ଯୋଗାଉଛି । ତେବେ ବିଗତ କିଛି ବର୍ଷ ଧରି ବାରମ୍ୱାର ବିପଦ,ଅଘଟଣ, ପ୍ରକୃତିପ୍ରେମୀ  ତଥା ପର୍ଯ୍ୟଟକଙ୍କୁ ଭୟଭୀତ କରୁଛି । ତେବେ ବେପରୁଆ ନୀତି ଓ ଲାଇଫ୍ ଜ୍ୟାକେଟର ବ୍ୟବହାର ନକରିବା ଓ ପ୍ରତିକୂଳ ଯୋଗୁଁ ପାଗ ଏଥିପାଇଁ ଦାୟୀ।

ନୀଳାମ୍ବୁ ଚିଲିକା ପ୍ରତି ଯେତିକି ଆକର୍ଷଣ,ସୁରକ୍ଷାକୁ ନେଇ ପର୍ଯ୍ୟଟକଙ୍କ ମଧ୍ୟରେ ସେତିକି ଭୟ । ଏ ନେଇ ବାଲୁଗାଁ ସରକାରୀ ବିଦ୍ୟାଳୟ ପରିସରରେ ବୁଦ୍ଧିଜୀବୀ, ସାମ୍ବାଦିକ, ମତ୍ସ୍ୟସଂଘ, ସରକାରୀ ଓ ବେସରକାରୀ ମୋଟର ବୋଟ ସଂଘର ସଭାପତି ସଂପାଦକ ,ଆଇ.ଏନ୍.ଏସ୍. ଚିଲିକାର କମାଣ୍ଡାଣ୍ଟ ଏକ ଆଲୋଚନା ଓ ସାଧାରଣ ସଭାରେ ଭାଗ ନେଇଥିଲେ। ବେସରକାରୀ ମୋଟର ବୋଟ ସଂଘର ସଭାପତି,ବୋଟ୍ ଚାଳକଙ୍କ ସମସ୍ୟା ନେଇ ଦୃଷ୍ଟି ଆକର୍ଷଣ କରିଥିଲେ । ସଂଘର ଚାଳକ ଓ ମାଲିକ ୮୦ପ୍ରତିଶତ ନିଜର ଭରଣ ପୋଷଣ ପାଇଁ ଚିଲିକା ଉପରେ ନିର୍ଭରଶୀଳ । ଆର୍ଥିକ ସମସ୍ୟା ଭିତରେ ଗତି କରୁଥିବା  ଅନେକ ଚାଳକ ଯଥେଷ୍ଟ ପରିମାଣରେ ସେପ୍ଟି ଜ୍ୟାକେଟ ଯୋଗାଇ ପାରୁନାହାନ୍ତି । ସହଯୋଗ ପାଇଁ ସଂଘ ତରଫରୁ ପ୍ରଶାସନିକ ସ୍ଥରରେ ବାରମ୍ୱାର ଆଲୋଚନା ହୋଇଥିବା ବାଲୁଗାଁ ମୋଟର ବୋଟ ସଂଘର ସଭାପତି କୃଷ୍ଣ ବେହେରା ମତ ଦେଇଥିଲେ । ସେପଟେ କାଳିଯାଇ ମନ୍ଦିର ଜେଟି ଉନ୍ନତି କରଣ ହେବା ନେଇ ଉପସ୍ଥିତ ସଦସ୍ୟା ମାନେ ମତ ରଖିଥିଲେ । ଚିଲିକାରେ ସୃଷ୍ଟି ହେଉଥିବା ଅଚାନକ ଘୂଣ୍ଣି ବାତ୍ୟାରେ ବିଶେଷ ବିପଦ ଦେଖାଯାଇଥାଏ ଓ ରଖିବାର ସ୍ଥାନ ସଂକୋଜନ ଦୃଷ୍ଟି କୋଣରୁ ବୋଟ ଓ ଚାଳକ ସେଠାରୁ ବାହାରି ଆସିବାକୁ ବାଧ୍ୟ ହୁଅନ୍ତି । ଫଳରେ ବିପଦକୁ ସାମ୍ନା କରିବାକୁ ହୁଏ ।

ସଂଘର ଅନ୍ୟତମ ଉପଦେଷ୍ଟା ଗନ୍ତାୟତ ତରାଇ ଚିଲିକାରେ ସୁରକ୍ଷା ପଦକ୍ଷେପ ସହ ବିକାଶ ନେଇ ନିଜର ମତ ରଖିଥିଲେ । ବିଭିନ୍ନ ପର୍ବ , ବିଶେଷ କରି ଶୀତଋତୁ ସମୟରେ ପର୍ଯ୍ୟଟକଙ୍କ ଭିଡ ଯୋଗୁଁ ବିଭିନ୍ନ ଜେଟିମାନଙ୍କରେ ପର୍ଯ୍ୟପ୍ତ ପରିମାଣରେ ପୋଲିସର ମୁତୟନର ଆବଶ୍ୟକତା ରହିଛି । ସରକାର ସହଯୋଗ କଲେ ଆସନ୍ନ ବିପଦ ମୁକ୍ତ ଚିଲିକା ପରିଭ୍ରମଣ ସହଜ  ହୋଇପାରିବ ବୋଲି  ସମସ୍ତେ ମତ ଦେଇଥିଲେ।

ଚିଲିକା ତହସିଲଦାର ପ୍ରଦିପ କୁମାର ସାହୁ ସଭାକୁ ଅଧ୍ୟକ୍ଷତା କରିବା ସହ ସମସ୍ତ ଅଭିଯୋଗ ଓ ଆବଶ୍ୟକୀୟ ପଦକ୍ଷେପ ଜିଲ୍ଲାପାଳ ଓ ବିଭାଗୀୟ ଅଧିକାରୀଙ୍କୁ ଅବଗତ କରାଇବେ ବୋଲି ସୂଚନା ଦେଇଥିଲେ ।ବୋଟ ମାଲିକ ଆବଶ୍ୟକୀୟ ଯାତ୍ରୀଙ୍କ ଠାରୁ କମ ସଂଖ୍ୟା ଯାତ୍ରୀ ନେବାସହ ସନ୍ଧ୍ୟା ପୂର୍ବରୁ ଫେରିବା ଉପରେ ଧ୍ୟାନ ଦେବା ଆବଶ୍ୟକ। ପୋଲିସ ପ୍ରଶାସନକୁ ଭିଡ ସମୟରେ ସହଯୋଗ କରିବା ଜରୁରୀ । ସାଧାରଣ ସଭାରେ ଯୋଗଦେଇଥିବା କମାଣ୍ଡାଣ୍ଟ ଶିବ ନାରାୟଣ ସିଂ ନିଜ ବକ୍ତବ୍ୟରେ ,ଚିଲିକା ମଝିରେ ଓ ପରିବେଶରେ ଥିବା ସମସ୍ତ ଧର୍ମପୀଠ, ପର୍ଯ୍ୟଟନସ୍ଥଳୀ ପରିସ୍କାର ରଖିବା ସହ ସରସ ସୁନ୍ଦର କରିବା ପାଇଁ  ଆହ୍ୱାନ କରିଥିଲେ ।

 ସାଧାରଣ ସଭାକୁ ସ୍ଥାନୀୟ ଏସ୍.ଡି.ପି.ଓ. ମାନସ ରଂଜନ ବାରିକ ଆୟୋଜନ କରିଥିଲେ। ଉପସ୍ଥିତ ଏଠାରେ ସମସ୍ତଙ୍କୁ ଏକତ୍ରିତ ଭାବେ ଉଦ୍ୟମ ସହ ଚିଲିକାରେ ଡଙ୍ଗାବୁଡିରୁ ରକ୍ଷା କରିବା ପାଇଁ ସହଯୋଗ ସହ ଶୃଙ୍ଖଳିତ ପରିବେଶ ସୃଷ୍ଟି କରିବାକୁ ନିବେଦନ କରିଥିଲେ।