ଦିଲ୍ଲୀ ଉପ-ମୁଖ୍ୟମନ୍ତ୍ରୀ ପଦରୁ ମନୀଷ ସିସୋଦିଆ,କ୍ୟାବିନେଟ ମନ୍ତ୍ରୀ ପଦରୁ ସତେନ୍ଦ୍ର ଜେନଙ୍କ ଇସ୍ତଫା

ଶବ୍ଦଓଡ଼ିଶା ବ୍ୟୁରୋ:ଦିଲ୍ଲୀ ଉପ-ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ଆପ ନେତା ମନୀଷ ସିସୋଦିଆ। ମଦ ନୀତି କେଳେଙ୍କାରୀ ମାମଲାରେ ସିବିଆଇ ଦ୍ବାରା ଗିରଫ ହୋଇ ଜେଲରେ ଥିବା ସିସୋସିଆ, ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କ ନିକଟକୁ ଇସ୍ତଫା ପତ୍ର ପଠାଇଛନ୍ତି । କେବଳ ସିସୋଦିଆ ନୁହେଁ କେଜରିଓ୍ବାଲଙ୍କ କ୍ୟାବିନେଟରେ ସ୍ବାସ୍ଥ୍ୟ ଓ ଶକ୍ତି ବିଭାଗ ମନ୍ତ୍ରୀ ଥିବା ସତ୍ୟୈନ୍ଦ୍ର ଜେନ୍‌ ମଧ୍ୟ ଇସ୍ତଫା ଦେଇଛନ୍ତି ।

ମିଳିଥିବା ସୂଚନା ଅନୁସାରେ, ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଉଭୟଙ୍କ ଇସ୍ତଫା ପତ୍ର ଗ୍ରହଣ କରିଛନ୍ତି ।ପୂର୍ବରୁ କ୍ୟାବିନେଟ୍ ମନ୍ତ୍ରୀଥିବା ସତ୍ୟୈନ୍ଦ୍ର ଜେନ୍‌ ବ୍ୟାପକ ଅର୍ଥ ହେରଫେର୍‌ ମାମଲାରେ ଗିରଫ ହୋଇଥିଲେ । ସତ୍ୟୈନ୍ଦ୍ରଙ୍କୁ ଆର୍ଥିକ ହେରଫେର୍‌ ମାମଲାରେ PMLA ଆକ୍ଟରେ ଗତ ମେ ୩୦ ତାରିଖରେ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) । ତାଙ୍କ ବତରୁଦ୍ଧରେ ଅଭିଯୋଗ ଥିଲା ଯେ, ସତ୍ୟୈନ୍ଦ୍ର ଜୈନଙ୍କ ମାଲିକାନାରେ ଥିବା ଏକାଧିକ କମ୍ପାନୀରେ ବ୍ୟାପକ ଆର୍ଥିକ ଅନିୟମିତତା ହୋଇଛି । ଏହା ସହିତ ତାଙ୍କ ପରିବାର ଲୋକଙ୍କ ନାଁ ରେ ମଧ୍ୟ ବେଆଇନ ଅର୍ଥ ଠୁଳ ଅଭିଯୋଗ ହୋଇଥିଲା ।

ଯଦି ସିସୋଦିଆ ଓ ଜୈନଙ୍କୁ ୨ ବର୍ଷ ଜେଲ ଦଣ୍ଡାଦେଶ ହୁଏ ତେବେ ସେମାନେ ବିଧାନସଭା ସଦସ୍ୟ ପଦ ମଧ୍ୟ ହରାଇପାରନ୍ତି । କେବଳ ସେତିକି ନୁହେଁ ୨ ବର୍ଷରୁ ଅଧିକ ଜେଲରେ ରହିଲେ ଆଗାମୀ ୬ ବର୍ଷ ଯାଏଁ ନିର୍ବାଚନ ମଦ୍ୟ ଲଢିପାରିବେ ନାହିଁ । ତେବେ ବର୍ତ୍ତମାନ ଆପ୍‌କୁ ଘାରିଲାଣି ସ୍ବଚ୍ଛତା ଭୟ । କାରଣ ଦଳର ଦୁଇ ଦୁଇ ଜଣ କ୍ୟାବିନେଟ୍‌ ମନ୍ତ୍ରୀ ଏବଂ ଦବଦବା ଥିବା ନେତା ଏବେ ଜେଲରେ । ତେଣୁ ଆଗାମୀ ଦିନରେ କେଜରିଓ୍ବାଲ ତାଙ୍କ ଭାବମୂର୍ତ୍ତି ରକ୍ଷା କରିବାକୁ ସବୁଠାରୁ ବଡ ଚ୍ୟାଲେଞ୍ଜ ହେବ ।ଏହା ଆମ ଆଦମୀ ପାର୍ଟି ପାଇଁ ଏହା ଏକ ବଡ଼ ଝଟକା ବୋଲି କୁହାଯାଇ ପାରେ।