ଦେଶରେ ବଢୁଛି ଏଚ୩ଏନ୨ ଭାଇରସରେ ଆକ୍ରାନ୍ତଙ୍କ ସଂଖ୍ୟା

ଶବ୍ଦ ଓଡିଶା ବ୍ୟୁରୋ: ମହାମାରୀ କରୋନା ପରେ ଇନଫ୍ଲୁଏଞ୍ଜା ଆତଙ୍କ । ଦେଶରେ ଏବେ ବ୍ୟାପୁଛି ଏଚ୩ଏନ୨ ଭୂତାଣୁ । ତେବେ ଏହାକୁ ନେଇ ସତର୍କ ରହିବାକୁ ଦିଲ୍ଲୀ ଏମ୍ସର ପୂର୍ବତନ ନିର୍ଦ୍ଦେଶକ ରଣଦୀପ ଗୁଲେରିଆ ପରାମର୍ଶ ଦେଇଛନ୍ତି । ବିଶେଷକରି ବୟସ୍କ ବ୍ୟକ୍ତି ସାବଧାନ ରହିବାକୁ ସେ କହିଛନ୍ତି । ତେବେ ଥଣ୍ଡା, କାଶ ଅଧିକ ସମୟ ଶରୀରରେ ରହୁଥିବାରୁ ଚିନ୍ତା ବଢିବାରେ ଲାଗିଛି ।

ଏଚ୩ଏନ୨ ସଂକ୍ରମଣର ଲକ୍ଷଣ
ଏଚ୩ଏନ୍-୨ରେ ପୀଡିତ ଲୋକଙ୍କ ଠାରେ ଥଣ୍ଡା, କାଶ, ଜ୍ୱର, ନାକରୁ ପାଣି ବାହାରିବା, ଶ୍ୱାସ କ୍ରିୟାରେ ସମସ୍ୟା, ଗଳା ଦରଜ, ଗଳାରେ କଫ ଜମିବା, ଦେହ ଦରଜ ଭଳି ଲକ୍ଷଣ ଦେଖାଦେଉଛି । କିନ୍ତୁ ସାଧାରଣ ଥଣ୍ଡା, କାଶ, ଜ୍ୱରଠୁ ଏହା ଅଧିକ ସମୟ ଶରୀରରେ ରହୁଥିବାରୁ ଚିନ୍ତା ବଢିବାରେ ଲାଗିଛି । ସେପଟେ ରଣଦୀପ ଗୁଲେରିଆ କହିଛନ୍ତି ଏହା ଇନଫ୍ଲୁଏଞ୍ଜା ସଂକ୍ରମଣ ଓ ପ୍ରତିବର୍ଷ ଏହି ସମୟରେ ଦେଖା ଦେଇଥାଏ ।
ଆଇସିଏମଆର କହିଛି ଯଦିଓ ଏହି ଭାଇରସ ଘାତକ ନୁହେଁ ତଥାପି ସର୍ତକ ରହିବା ଜରୁରୀ । କାଶ ଥଣ୍ଡାକୁ ଡରନ୍ତୁ ନାହିଁ । କୋଭିଡ ନିୟମ ପାଳନ କରି ସୁସ୍ଥ ରୁହନ୍ତୁ । ଆଇସିଏମଆର ପରାମର୍ଶ ଦେଇଛି…

କ’ଣ କରିବେ ?
ନିୟମିତ ଭାବେ ହାତକୁ ବାରମ୍ବାର ଧୁଅନ୍ତୁ
ସର୍ବସାଧାରଣ ସ୍ଥାନରେ ମାସ୍କ ପିନ୍ଧନ୍ତୁ
ଫ୍ଲୁ ଭଳି ଲକ୍ଷଣ ଥିଲେ ମାସ୍କ ପିନ୍ଧିବାକୁ ଭୁଲନ୍ତୁ ନାହିଁ
ଛିଙ୍କିବା ଓ କାଶିବା ବେଳେ ମୁହଁ ଓ ନାକକୁ ଘୋଡାଇ ରଖନ୍ତୁ
ପ୍ରଚୁର ପାଣି ପିଅନ୍ତୁ
କାହା ସହିତ ହାତ ମିଳାନ୍ତୁ ନାହିଁ
ସର୍ବସାଧାରଣ ସ୍ଥାନରେ ଛେପ ପକାନ୍ତୁ ନାହିଁ
ମୁହଁରେ ବାରମ୍ବାର ହାତ ଲଗାନ୍ତୁ ନାହିଁ
ସାମାଜିକ ଦୂରତା ରକ୍ଷା କରନ୍ତୁ